விதைப்பையைச் சூரியனில் காயவைப்பவன்

 

கண்ணாடிச் சில்லுகளால் தூரத்தை எறிந்தபடி

எஞ்சிய கிளையில்

தூளி ஆடுகிறாள் சிறுமி

கால் நுனியால் பூமியை அள்ளிச் சுமந்து  

முன்னும் பின்னுமாய்த் திசைகளை ஆட்டுகிறாள்

சிதறி விழாது காலிடுக்கை 

இறுக்கிப் பிடித்திருக்கின்றன   

கடுகளவிலான பூமிகள்

தக்குதீன்கான் தெருமுனைச் சுவரோடு

கால்பந்தாட்டமாடும் சிறுவன்  

துருப்பிடித்த இரு மின் இணைப்புப் பெட்டியின் நடுவே 

சராயை அவிழ்த்துச் சிறுநீர் பெய்கிறான்

பெய்தலினிடையே

`தனி வீடு 18 லட்சம்' எஞ்சிய சுவரொட்டியைக் கிழிக்கிறான்

அவனற்றுச் சுவரோடு ஆடி

ஆட்டோவின் அடியில் பதுங்கிய பந்தை

மியாவ் சத்தம் உதைத்துத் தள்ளியது

சுவரில் பொருத்தப்பட்ட அடிகுழாய்

இரும்புக் கம்பிகளை உடுத்தியிருக்கிறது

விதைப்பையைச் சூரியனில் காயவைத்தபடி

மீன்பாடி வண்டியில் உறங்குபவன் மீது  

புரண்டு படுக்கிறது நடைமேடை

பானை வயிற்றைத் தடவி 

வாசலில் நடமாடும் பெண்

வெற்றிலை எச்சிலால் தெருவையே சிவக்க வைக்கிறாள் 

குப்பைத்தொட்டியின் அருகே 

தானிய மணிகளை மேயும் கால்நடை

குப்பைத்தொட்டியையும் சேர்த்தே விழுங்குகிறது

ஆலம் விழுதுகள் தூண்களாகிப் போன 

வீட்டினைப் பார்த்து

வெகுநேரமாய்க் காத்திருக்கிறது

இந்தச் சாலை 

எப்போதுதான் கடக்குமோ

 

துள்ளி வரும் ஏமாந்த நா

அ

திருவான்மியூர் தீவுப் பூங்காவின் இரும்புக் கதவு

துருப்பிடித்திருக்கிறது

எஞ்சிய பகுதிகளையும் இளைக்கும் மாட்டின் கயிறு

இரு மின்கம்பங்களுக்கிடையே 

கேபிள் வயரில் பயணிக்கிறது அணில்

தீவு மூழ்கும்படி பூத்திருக்கும்

இளஞ்சிவப்புக் காகிதப் பூக்கள்

அதன் முள்ளில் ஆடுகிறது சிட்டுக்குருவி

வேர்களில் இரை தேடும் எலி

வாகனச் சத்தத்தில் ஒளிகிறது

ஆ

சிறுநீர் நாற்றத்தில் நொங்கு விற்கிறான் 

தண்ணீர்ப் போத்தலில் முகங்கழுவிய அவன் மனைவி

கிழக்கை வணங்குகிறாள்

வெகுநேரமாய்த் தலைகோதும் மற்றொரு பெண்

குவிந்து கிடக்கும் வாகன உதிரிப் பாகங்கள் மீது

மூக்கை எறிந்தாள்

பின்பு மாட்டு மூத்திரத்தில் கோணியை விரித்து 

கூம்பு வடிவக் கொண்டைகளோடு 

தேங்காய்களை அடுக்குகிறாள்

தார்ச்சாலையை மறைத்திருக்கும் 

மாட்டுச் சாணத்தில் வாகனத் தடங்கள்

ஒலிக்காமல் கிடக்கும் கழுத்து மணியை உற்று நோக்கித்

தெருவிளக்கின் உச்சியில் அமர்ந்திருக்கிறது பறவை

இ

சாலையோரத்தை அசைபோடும் கொம்புகளை

ஹாரன் சத்தம் இடைவிடாது எழுப்புகிறது

பூமி நடுங்க எழுந்து நகருகையில்

மூங்கில் கழி முதுகெலும்பை நொறுக்கியது

கதறலுடன் சந்தைக்குள் நுழைந்த மாடு

குட்டியானையில் பொறிக்கப்பட்ட 

தேசியக் கொடியின் பச்சையத்தைத் துழாவியது

குப்பை லாரியில் மீந்த காய்கறிகளை எட்டி எட்டிப் பார்த்து

ஏமாந்த நாக்கு 

துள்ளி வருகிறது 

தூரத்தில்

நட்சத்திரங்களைக் கோத்தல்...

1

இந்த உலகின் சுவர் இரும்பாலானது

உடைந்த அதன் பெருந்துளையில் நுழைந்துதான்

ஓர் மிருகம் 

தன் இன்னோர் உலகத்தைக் கண்டடைகிறது

வெளியேற்றத்திற்கு முன்

எத்துணைக் கோடி முறை

சுவர்களையே சுற்றிச் சுற்றி வந்தது தெரியுமா

அந்நினைவுகளை அசைபோட நினைக்கையில் 

இப்பிரபஞ்சம் மங்கலாகிவிடுகிறது

2

நடைமேடையை விடச் சற்று உயரமாக வளர்ந்தவள்

பிவிசி குழாயில் கட்டிய நைந்த குடையின் கீழ்

நட்சத்திரங்களைக் கோக்கிறாள்

பின்னலை முடிய காத்திருப்போரின் எண்ணிக்கை

தண்டவாளம் போல் நீண்டு செல்கிறது

3

செங்கல் நிற சென்ட்ரல் ரயில் நிலையம் அருகே 

வெறுந்தரையில் படுத்து உருளும் சிறுமி

மயில் பீலியைக் கடித்துச் சுவைக்கிறாள்

குண்டியால் பூமியைத் தேய்த்தபடி

தாயின் திசையைத் துரத்தியவள்

காயத்தின் மீது மண்ணை அள்ளிப் பூசுகிறாள்

நறுக்கிய வெள்ளரிக்காய்களின் இடையே

குறுங்குச்சியைச் செருகியவள் 

நிற்காது அழும் குழந்தையை அள்ளி 

தன் இரு முலைகளையும் சேர்த்து ஊட்டுகிறாள்

4

No Parking பதாகை நிழலில்

வெட்டி வேர்களை சீசாவுக்குள் அடைத்து வைக்கிறாள்  

சீசாவை விற்ற ரூபாய் நோட்டை

மார்பின் நரைமுடியில் ஒளித்த அவள் கணவன்

இரண்டு சீப்பின் விலையை

அவள் மடியில் எறிகிறான்

கழுகு வட்டமிடும் பிரமாண்ட தேசியக் கொடி

மேற்கின் காற்றில் தேசத்தை அசைக்கிறது 

இங்கு கடவுளின் காதுகள் பிடுங்கப்படும்

I

ராணுவ முகாம் பாடி கார்டு முனீஸ்வரர், மூச்சுக் காற்றின் நெருக்கடியால் சாலைக்கு இழுத்து வரப்பட்டார். தற்போது அவர் பல்லவன் சாலை அரச மரநிழலில். இடைவிடாத வாகன இரைச்சல் ஈஸ்வரனின் காதுகளைப் பிடுங்கிச் செல்கிறது. 

II

கிழக்கு பார்த்த வாகனங்கள் சந்தனம் குங்குமிட்டுச் சாமந்தியைச் சூடின. அந்தச் சாமந்தியில் சிறிது பறித்து உள்ளங்கையில் திணிக்கிறான் பூசாரி. இறுதியில் வாகன உரிமையாளரிடம் உள்ளங்கையை ஏந்திய பூசாரி, உதடு பிதுக்கித் தலை கவிழ்கிறான்.  

III

எலுமிச்சம் பழங்களைச் சக்கரங்களாக்கும் முனீஸ்வரன், சுருட்டைப் பற்றவைத்துக் குதிரையேறிச் செல்கிறான். அவன் காதிடுக்கில் செருகிய சாராய போத்தல் சலசலக்கிறது.

IV

சதுரமான கம்பி வளையத்திற்குள் விபூதியைத் துழாவும் விரல்கள், விபூதியின் மென்மையில் காணாமல் போகின்றன. கம்பிக்கூண்டில் அடைக்கப்பட்ட சேவல் வாழையிலையைக் கொத்தி இழுக்கிறது. 

நடைமேடை 5 இல்

ஒட்டடை படிந்த வெளிச்சத்தில் ஒளிரும்

யாருமற்ற சுரங்கப் பாதை

கையேந்தியபடி படியில் அமர்ந்திருப்பவன்

கால்களைக் கழட்டி 

முதுகின் பின் மடித்து வைத்துள்ளான்

கண்ணாடி வளையலோசையில் 

புரண்டு படுக்கிறது நடைமேடை 

வானை உரசி வாயைப் பற்றவைத்தவன்

உதிர்ந்த மல்லிகைப் பூக்களைப் பொறுக்கித் தின்கிறான்

அந்தப் பொறுக்கலின் மீது பெய்கிறது

தூரத்து வாகன வெளிச்சம்

மல்லாக்க உறங்குபவன்

இடுப்புக்கும் கீழ் நுழைத்த வலக்கையை

எடுப்பேனா என்கிறான்

விண்மீனற்ற கருநீல வானின் அடியில்

உடைந்த பொம்மைகளாய்ச் சிதறிக் கிடக்கும் மானிடம்

பூமி வடிவ சிசிடிவி கேமராவின் கீழ்

வெகுநேரமாய் அழுகிறாள் 

வெகு

நேரமாய்....

தாம்பரம் ரயில் நிலைய ஒலிபெருக்கியில்

`சென்னை எக்மோர் வரை செல்லும் நெல்லை எக்ஸ்பிரெஸ்

இன்னும் சற்று நேரத்தில்

நடமேடை 5 ஐ வந்தடையும்.'

 

காற்றில் விளையும் நறுமணம்

மாம்பல ரயில்நிலையத்தில் தொடங்கிய இரும்பு மேம்பாலம்

மேட்லி சாலையில் முடிவுறாது நிற்கிறது 

நெருப்புச் சில்லுகள் விழும் அதன் அடியில்

கரும்பின் கணுக்களைச் சீவி

அடிக்கட்டையை வெட்டி எறிகிறான்

இனிப்பென்ற வார்த்தையை எறும்புகள் மொய்க்கின்றன

ஒரு கட்டு அறுகம்புல்லை

பத்து ரூபாய்க்கு விற்பனை செய்பவள்

நாவற்பழச் சுவை மீது உப்பைத் தடவுகிறாள்

வெய்யிலில் காயும் பூணூல்

தோல் நீங்கிய சுளைகளில் கண்களைச் செருகியது

வாகனங்களுக்கிடையே 

ஊக்குகளை வயிற்றில் ஏந்தி விற்பவனிடம் 

சந்தைக்கே நறுமணம் பூசியவள்

ஒரு கொத்து ஊக்குகளைச் சேர்த்து வாங்கிச் செல்கிறாள்

நெருக்கடி மிகுந்த அங்காடித் தெருவில்

மீன் வடிவப் பீப்பியை ஊதுகிறான் சிறுவன்

அது வளைந்து நீண்டு ஒலிக்கிறது

ஒருமுறை வானை இழுத்தும்

மறுமுறை பூமியைத் தூக்கியும்

விளக்குகள் எரியா சிக்னலில்

கேள்விக் குறியைக் கைத்தடியாய் இறுக்கிப் பிடித்துள்ள

பெரியார் சிலை முற்றும் தூசி படிந்துள்ளது 

உச்சந்தலையில் காய்ந்த பறவையின் எச்சம்.

இரைப்பையைப் பகிர்ந்து ஊட்டுதல்

 

ராட்டினமாய்ச் சுற்றும் குடையின் கீழ்

நடைமேடையை அள்ளித் தின்னும் சிறுவன்

வெற்றுத் தண்ணீர்ப் போத்தலைக் கவ்வியபடி

வான் நோக்கி நடனமிடுகிறான்

பதாகை கிழிந்த கம்பிகளுக்கிடையே சிக்கிய பறவை

விடுபடமுடியாமல் சிறகடிக்கிறது

மயில் தோகைகளைச் சுமந்து சென்றவன்

தன்னை விரித்து ஆடுகிறான்

மிக்ஸியில் அரைபடும் மாதுளங்கனிக்கு

ஐஸ்கட்டி உடைபடுகிறது

மேகங்கள் பொழியும் மாதுளம் மழையை

வாய் பிளந்து நாக்கடியில் சேகரிக்கிறது மாநகரம்

முன்சக்கரமற்ற துருப்பிடித்த மிதிவண்டி அருகே

நிரம்பி வழியும் குப்பைத்தொட்டி

அதன் உச்சியை இழுத்துச் செல்லும் பூனை

ஒவ்வொரு இரு சக்கர வாகனத்திலும் பதுங்குகிறது

இப்போது மாதுளம் மழை

பாலித்தீனில் வாய் வைத்த 

மிருகத்தின் முதுகுத் தண்டில் பெய்கிறது

தன் உடலைக் குலுக்கி ஓடி

செல்போன் கடையின் தூசி படிந்த படிக்கட்டை

நக்குகிறது

அந்த நக்குதலின் மீது

தன் இரைப்பையைப் பகிர்ந்து வைத்த வயோதிகன்

நேர்க்கோட்டைப் போன்ற வானத்தின் அடியில்

அறுந்த கால்களைத் தைத்துக்கொண்டிருக்கிறான். 

நின் அப்பம் சிறகுகளால் ஆனது

தண்டீஸ்வரம் பிரதான சாலையின் நடுவே

நசுங்கிய மாங்கனியை மிதித்தவன்

சற்று தொலைவில் பிதுங்கிக் கிடக்கிறான்

சேவல்கொண்டைகளாய் உதிர்ந்து கிடக்கும்

செங்கொன்றைப் பூக்கள்

ரத்தத் துளிகளாய்ச் சொட்டுகின்றன

அந்தச் சொட்டுகளைக் கூட்டிப் பெருக்கி

வண்டியில் ஏற்றும் துப்புரவுத் தொழிலாளி

செவக்கச் செவக்க வெற்றிலையை

வானில் இறைக்கிறார்

யாருமற்ற தேவாலய வாசலில்

வெகுநேரமாய் ஏந்தும் கைகளில் கொட்டியது

கருங்கற்களிலிருந்து வழியும் சிலுவையின் ரத்தம்

சிதறிய தேங்காய்ப் பருப்புகளை

முதுகெலும்புகள் காய்த்த விலங்கு கவ்விச் செல்கிறது

மட்கும் குப்பையை 

அலகுகள் உடைந்த பறவை கொத்திப் பறக்கிறது

அடுக்கிய பழங்களை

காலிழந்த வண்டு ரீங்கரித்தபடி துளையிடுகிறது

வெகுநேரமாய் ஏந்திய கைகள்

காலியான தூக்கை வான்பார்த்து எறிந்தன

அப்போது ஆலய மணி ஒலிக்கத் தொடங்கியது 

புறாக்களின் சிறகுகளால் நிறைந்தது வானம். 

கடலை நகர்த்துதல்

வெள்ளிக் கடல் நுரைகளில்

தன் தாயுடன் கால் நனைக்கும் சிறுவனைக் கண்டேன்

இருவரும் சேர்ந்து

அலைகளின் ஈரத்தில் சிப்பியைப் பொறுக்கினர்

கண்ணாடித் தொட்டியில் நீந்தும் மீனுக்குச் சேகரிப்பதாய்

சிறுவன் சொன்னான்.

கடலை நகர்த்தி நகர்த்தி

அலைகளைப் பொறுக்கலானேன்

பின் பரிச்சயமற்ற அவனின் கைகளில்

உள்ளங்கையளவு சிப்பிகளைப் பரிசளித்தேன். 

முலை வணக்கம்

சந்தன முலைகளால் சூரியனை வணங்கியவள்

சேலையில் தேங்கிய கடலை 

கசக்கிப் பிழிந்து உலரவைக்கிறாள்

முன்னதாக 

ஆடைகளைக் கரையொதுக்கிய அலைகள்

அவளை மட்டும் இறுக்கி அணைத்துத் தழுவின.

கிழக்கில் ஆடும் வால்

கடற்கரைப் புல்வெளியில்

செங்குத்தான இரண்டு கொம்புகள் மேய்கின்றன

செல்போனில் முகம் புதைத்தபடி

துண்டைக் கட்டி உள்நுழையும் ஆடவர்கள்

தண்ணீர்ப் போத்தலை நட்டுவைத்துக் குத்துக்காலிட்டனர்

ஒருவன் 

வெகுநேரமாய்ப் புல்வெளியைக் கழுவிக்கொண்டே இருக்கிறான்

மற்றொருவன் 

காலிப் போத்தலுடன் வெளியேறுகிறான்

அப்போது அடித்த பலத்த காற்றில்

கரையில் நழுவிய துண்டு

அலைகளில் மிதந்தலைகிறது 

ஏதும் அறியா அவன் 

நிர்வாண வீடியோவில் குதூகலிக்கிறான்

புற்களை விட அமோகமாய் விளைந்திருக்கும்

பாலித்தீன்களை மேய்ந்த மாடு

கிழக்கு நோக்கி வாலை ஆட்டுகிறது. 

உடைந்த கண்ணாடியில் சூர்யோதயம்

மின்சாரப் பெட்டியின் அருகாமையில்

தன்னை விரித்து உறங்கும் சிறுவனை

இறுக்கிப் போர்த்தியிருக்கிறது பாய்

இன்னும் திறக்கப்படாத பிரியாணிக் கடையின் முன்

மியாவ் மியாவ் சத்தம்

அந்தச் சத்தத்தின் மீது

ரொட்டியை வீசுகிறான்

மியாவ் மியாவ் நின்றபாடில்லை.

தொப்புளைத் திறந்து 

பழுப்பு நிறப் பணப் பையை உருவியவள் 

ஆய்ந்து எறிந்த முருங்கைத் தண்டினால்

முதுகு சொரிகிறாள்

கருமையான குறுந்தடியை ஊன்றி

ஒட்டகம் போல் நடக்கும் மூதாட்டி

அவள் முதுகின் கீழ்

தண்ணீர்ப் போத்தல் சலசலக்கிறது. 

குன்றின் வடிவக் கோதுமை மாவை 

உருட்டிப் பிசைகிறான்

ஈரமற்ற மாவின் மீது

அவன் வியர்வைத்துளிகள் விழுந்த பிறகுதான்

பிசைதல் இலகுவானது.   

எடைக்கல்லால் துலாக்கோலினைச் சரிபார்த்தவன்

கிழிந்த அட்டைப் பெட்டியால்

தரையைக் கூட்டுகிறான்

பின் இரும்பு முறமுள்ள 

நெளிந்து அழுக்கடைந்த ஈயச்சட்டியைச் சுமந்து

கிழக்கு திசையை நோக்கிப்

புகையை ஊதினான்

அப்போதுதான்

பாழடைந்த கட்டிடத்தின் உடைந்த கண்ணாடியில்

சூரியன் உதயமானது.

 

மெழுகுவத்திச் சுடர்களின் நடுவே

தொலைந்த செம்மறி ஆட்டை

தன் வெண்தாடிக்குள் யேசு தேடுகையில்

இரண்டு மெழுகுவத்திச் சுடர்களின் நடுவே

ஜெபமாலையைக் கவ்விப் பறக்கிறது வெண்புறா.

நீண்டு வளர்ந்த தாடி

ஆலஞ்சடையாய்ப் பூமியெங்கும் வேர்கொண்டது. 

அதன் நிழலில்  

கிழிந்த செருப்பு தையலிடப்படுகிறது

பிளந்த பலாச்சுளை கூறுபோடப்படுகிறது

பூண்டுகள் பாலித்தீனில் இறுக்கி முடியப்படுகின்றன 

மண்ணொட்டிய வேர்க்கடலைகள் படியளக்கப்படுகின்றன.

தாடியிலிருந்து தன்னைப் பிடுங்கியவர்

உலகின் ஒவ்வொரு மனிதரிடமும் சென்று

செம்மறியை விசாரிக்கையில் 

கோடை முடிவுற்றது.

நடுங்கும் பற்களுடன் தெருவிளக்கொளியில்

ஒருக்களித்துப் படுத்திருந்தார் யேசு. 

அந்த நடுக்கத்தின் மீது

கம்பளியைப் போர்த்தினான் ஒரு வழிப்போக்கன்.

யேசுவின் உடல்

இடைவிடாது கத்துகிறது 

மே... 

மே... 

மே...

எலும்புச் சுள்ளிகளின் கூடுகள்

சுரங்கப்பாதை நடைமேடையில் 

வரமிளகாய் காய்ந்துகொண்டிருந்தது.

அதன் காரத்தைக் கண்களில் கசக்கிய சாம்பல் நிற மிருகம்

வீசியெறிந்த கெட்டிச் சாம்பாரை 

நாவினால் பறித்துச் சுவைக்கையில் 

தொந்தியால் எட்டுவைத்தவன்

அச்சுவை மீது கஞ்சா நெடியை எறிந்தான். 

மேகங்களை வகிடெடுக்கும் உடைந்த கட்டிடத்திலிருந்து

எலும்புச் சுள்ளிகளைக் கவ்வியபடி சிறகடித்த பறவை

அவனின் உச்சந்தலையில் எச்சமிட்டது.

அன்று

வனமற்ற மாநகரில் 

ஒற்றை மரம் முளைத்தெழுந்தது.

இப்படித்தான் மனிதர்களின் தலைகளில்

பழங்கள் பழுத்தன மகனே.

வேர்களின் எடையைத் தாங்க இயலா மானுடம்

தலையை அரிந்து வானில் எறிந்துவிட்டது.

இருப்பதிலேயே பெரிய பழம்

இரவில் வரும் நிலாதான் மகனே

எறியப்பட்ட அத்தனை தலைகளும்

ஒன்றாய்ச் சேர்ந்து எரியும்

மகா கனியைச் சற்றும் புசிக்க விரும்பாதே மகனே

முண்டத்திற்கு வயிறு மட்டும் எதற்கென்று

இரைப்பையையும் பிய்த்து எடுத்துவிட்டோம்

அழுகிய காலை தலைக்கு வைத்து உறங்கும்

ஒரு ஜோடி காலணியில்  

எத்தனை பாதைகள் தேய்ந்தனவோ

அதிர்ச்சியுறாதே மகனே

இது காலணியல்ல

நம் இனத்தின் கடைசிக் கால்கள்.